الثلاثاء، 7 مايو 2013

أنا بحب الحياة ♥ :)

قبيل وحوالي الساعة 7 ونص pm , قاعدة في الهول في بيتنا وبشاهد في مسلسل ( طرف تالت ) 3 شباب أصحاب اتولدو في فقر شديد فقرروا انهم يتخلصو من الفقر ويصنعوا حياة كريمة لنفسهم وللناس البيحبوهم ...

_________________________

أثناء ما انا بشاهد في المسلسل ومستمتعا جددن فجاة ألقي تلفوني بيرن ( Emoo تتصل بك ) ايمو دي ايمان أختي الاكبر من الاكبر مني , هي دكتورة اسنان وحسي شغالة بتجهز في عيادتها حتفتتحها بعد كم يوم كدا , المهم: لقيتها بتقول لي تعالو ساعدوني في ترتيب حجات العيادة ...

______________________

لبسنا وطلعنا أنا وأختي الاكبر مني وركبنا الركشة عشان نمشي نساعد في ترتيب العيادة , وانا راكبة الركشة كنتا " مُنتشية " شدييد الجو كان جميل خالص / خالص فاتمنيت انو الحياة كلها تكون بالليل: جامعة / شغل / طلعات مع صحاب / زيارات / المهم: دخلنا العيادة لقينا الكهرباء قطعت قبل خمس دقايق بس " والله رجلينا ما حارات " , قعدنا نتونس ونضحك والموضوع كان ظريف شديد , بغض النظر عن السخانة الكانت حاصلة والظلام العجيب , لكن كنت فخورة بأختي ومبسووطة منها شديد بنوتة صغيرة يدوب في العشرينات بدت حياتها العملية وبقوة كمان ...

***************************************

ولأني ما بستحمل أقعد في مكان واحد ولفترة طويلة , قررت اني أنزل من العيادة وأتمشي في الشارع شوية , كنت مبسوطة شديد / شدييييد , علي فكرة كنت ماشة ومبتسمة برااي , جو أصحاب اتنين ماشين بجنبي قام واحد فيهم عاين لي من فوق لتحت وقال لصحبو: دي مالا دي , ماشا براااها وبتضحك ! ههههه

_________________________

وأنا ماشة في الشارع كنت بشوف :
انبساطتة الولد الماسك التلفون وبغازل في حبيبتو ..
بتاع الفول والطعمية وأملو في بكرة ..
حلاوة ست الشاي الفي الشارع ..
الأمل الفي عيون البت الطالعة من المستشفي وماسكة امها الما قادرة تمشي براها " أملها في انو أمها حتبقي كويسة وترجع ليهم زي زمان " ..

_________________________

في اللحظة ديك كنت شايفة أي حاجة حلوة يمكن تكون الحاجة دي زاااتها بشوفها كل يوم لكن ما بشوفها حلوة أو أصلا ما بتفرق معاي , لكن كنت وفي اللحظة ديك شايفاها حلوة وحلوة شديد كمان: البيوت / البقالات / محلات اللحوم / بتاع الفواكه ورصتو ليها / الانوار الفي الشوراع / الراجل البيعبي في البصل قدام السوبر ماركت / بتاع الطعمية وهو بيرمي فيها / ست الشاي وهي بتكب في الشاي وريحة البن ...
_________________________

حسيت في اللحظة ديك بانو الناس دي صااااافية شديد وحلوة من جووا . ومتفائلين ببكرة وشفتا في عيونهم الأمل , وفجأة اتذكرتا اني زمان / زمااان قريت لي كتاب كدا ما متذكرة اسمو شنو ولا حتي متذكرة كاتبو منو , لكن متذكرة انو الكاتب قال فيهو ( نحنُ لا نري العالم كما هو , بل نراه كما نريد أن نراه نحن ) ..

_________________________

أنا بحب :
الانبساطة
الفرح
الضحك
البهجة
الأمل
الحب
السلام
وبحب الحياة / أنا بحب الحياة
وبحب الناس الحواليي ..

♥ :) القلب والابتسامة ديل صادقااات ومن جوووووا ..

دين الانسان !

الدنيا سخااانة والناس عطشانة , الشمس سخنة / سخنة شدييييد ,, وبحب أغني ليها في اللحظة دي ياشمس ياشموسة انتي مُش حلوة ولا حتي عروسة .. أبوووس يدك خفي علينا شوية -_-

دا شنو دا ! حسي الجاب الكلام دا شنو : شمس / سخانة / حررر ... و.... دا كلو / كلو ما عندو علاقة بالموضوع :D

_________________________

المهم : الدين دا شئ مهم شدييييد , يعني بيهو ممكن الناس تمشي لقدام وبيهو برضو ممكن يكون مخدر والناس ترجع وراا ,, يلا بعداك الموضع بيكون حسب فهم الناس للدين
زاتو واستخدام ليهو في حياتهم ...

_________________________

الكيزان ...
كبايات الاشي ..
كبيات الموية ..
كاسات العصير ..
الجكوك ..
الملابن ..
الملاعق ..
السكاكين ..
الصواني ..
الصحانة ..
والكيزان ..
والكيزان ..
والكيزااااااان ..

يعني مثلا الكيزان ديل معظم الشعب السودان انتخبهم مش لأنهم واثقين منهم انهم حيودوا البلد لقدام وحيقدموا لي انسان السودان حياة افضل , ما انتخبوهم وصوتوا ليهو عشان فاكرينهم حيحسنو ليهم التعليم في البلد , ولا عشان فاكرينهم حيرخسوا ليهم المعيشة ويخفضوا ليهم سعر :
كيلو الطماطم ..
كيلو اللحة ..
ولا شوال السكر ..
ولا كيلو البطاطس ..
ولا حتي لبان ماربيلا ! ..

ولا حتي انتخبوهم وصوتو ليهم عشان فاكرينهم حيشغلو ليهم أولادهم بعد ما يتخرجوا , انتخبوهم لأنهم استخدموا حاجة الشعب دا مؤمن بيها شديد ( الدين ) خدروهم بوعدهم للشعب السوداني انو والله حنطبق شرع الله , يلا الشعب السوداني شعب متدين ( متدين دي مش قصدي انو بصلي كتير وبقيم الليل ويبقرأ القران كتير .... ألخ ) لأ أبدا ما قصدي قصدي انو متدين بتفكيروا , حسي أمسك ليك اقرب زول حايم في الشارع يمكن تلقاهو الصلاة دي يوم ما جربها لكن فجاة تتناقش معاهو في شئ يقول ليك :
ما قضاء وقدر
ما هو الموضوع كلو قسمة ونصيب
الله زاتو لو ما قال للحاجة كن ما بتكون
القدم ليها رافع ............. " هلم جرا " جري شديد ..

***************************************

يلا يا جماعة بالجد انا جادة بعد دا , دا الزيتوووون بتاع البوست :
في سؤال حايم في رأسي , يعني حسي أنا وانتا/ي مسلمين لييه لأنو من زمااااان من ما اتولدنا لقينا اهلنا مسلمين أماهاتنا وابائنا وخيلانا وجيرانا وعيال حينا البنعلب معاهم في الشارع واصحابنا في المدرسة كلهم / كلهم مسلمين ولأنو برضو القران بقول لينا في حتة كدا ( ان الدين هو الاسلام ) وفي المدراس بدرسونا قران وحديث حجات الدين عموماً , لكن ماف زول فينا يوم فتش في باقي الأديان المسيحة وغيرها وقارن ولقا روحو انو هو بالجد داير الاسلام دا عن قناعة وانو بالنسبة ليهو دا أحس دين أكرر عن قناعة مش لأنو لقا أهلو كدا ...

_________________________

طيب الناس في أمريكا / أوربا / استراليا المسيحين وناس الديانات التانية عموما , هم برضو نفس الشئ قاموا ولقو امهاتهم وابائهم وخيلانهم وجيرانهم وعيال حيهم البلعبو معاهم في ال Garden وأصحابهم الفي المدرسة مسيحين مثلا ودينهم قال ليهم انتو دينكم دا احسن دين وبرضو زي المسلمين ما فتشوا في الاسلام والديانات التانية ولقو انو المسيحة دي احسن ديانة بالنسبة ليهم ... الليلة والليلة كدا المسلمين وناس الديانات التانية متساوين لأنو ماف زول فتش كلهم لقو جاهز حسي يمكن انتا زااتك لو كنت أمريكي / أوربي / أسترالي تكون ما مسلم والامريكي دا لو كان سوداني مثلا حيكون مسلم ولا كيف ...

_________________________

انا كتبتا الكلام دا لشنو ,,, وحيات الله دي ما ذندقة ولا شئ .. أوعا تفهموني غلط :D

شباب بلدي زي الفل ..

صح حسي انا نعساانة وعايزة أمشي سريري / سريري الأنا بحبو وما بعرف بنوم في غيرو !
سريري اللما اخت راسي فيهو بحسن بانشرااااحة كدا جواااي
وبطانيتي الحنييييينة ,,, يا سلااااااااااااام
" حقو ابطل انصرافية / وغزل في السرير والبطانية وأخش في الموضوع " :D

_________________________

صح في حجات كتيييرة انا عايزها , ولسا ما قدرتا اتحصل عليها
وصح في حجات كتيرة /كتيرة بتحصل في حياتينا تقريبا بتزهج وبتفقع المراة ( كمساري يهرشك / سواق يفوتك المحطة / تعمل شئ انتا شايفو صح والمجتمع شايفو غلط فيقوم يضايقك / تتعب و تتعب وتجرررري في حاجة وبعدا دا كلو ما تلقاها / تخسر ناس / وتكسب تانين ..............ألخ ) ...

_________________________

صح أنا حسي خلصتا جامعة وبقولو علي عاااطلة , وأصحابي كل زول بيرمي لي قنبلة : البقول لي ما تفرحي شديييد راجياكي عطلة قاااتلة , والبقول لي راجيكي خدمة وطمام بطن , واليقول حتمري ليكي بكم محاولة انتحار فاشلة ! / والبقول ليك شوفي ليكي عريس يلمك أخير ليك ....... ألخ ...

_________________________

وصح حسي انا دايرة لي شغل وما لاقية / صح برضو دايرة .........وما لاقية / وصح برضو هنااي وما لاقية .......... ألخ ..
وطبعاً بقول لي روحي " أعملي رااايحة ياحجة "

***************************************

المهم : عايزة أقول برضو الناس دي طيبة " الناس بصورة عااامة " وفيها خير كتيير , يمكن في ناس جواهم خير بس ما بعرفو يعبروا عن الخير الجواهم بطريقة كويسة " زي ما بقولو الناس : التعبير بخونهم " , وبرضو عايزة أقول انو ماف زول بما فيهم انا ما فيهو حاجة ما كويسة , حاجة ممكن تغيظك وتضايقك لكن القصة كلها بتبقي وين ؟ بتبقي في ردة فعلك انتَ تجاه الحاجة البتحصل من الزول دا ...

_________________________

احنا مشكلتنا أننا ما قادرين نفهم بعض , غالباً ما بندي روحنا مساحة بتاعت حوار ونقاش عشان نسمع ونشوف الزول التاني بيعمل كدا ليه / بتصرف كدا ليه / يمكن كان لو أديناهو فرصة يعبر عن روحهو كان عرفنا سببو وعذراناهو , نحنا لو فهمنا بعض بالجد المشاكك بينا حتقل والحياة حتكون ظريفة جدددن ...

_________________________

البلد دي صح خربانة وعينها طااالعة وبلاويها كتيرة , لكن فيها :
* شباب عثثل ياخ
* شباب زي الفل
* شباب يرد الروح
* شباب يخلي الزول كدا " ينتشي "
زي الشباب الاخدو الجائزة بتاعت الفكرة الابداعية من Massachusetts Institute of Technology يعني دي من أحسن معاهد التكنولوجيا في العالم , وشباب تاني جا في المركز الأوول ركزوا معاي الأوووووول في مسابقة المناظرات باللغة العربية العلموها في الدوحة , ووحدة سودانية فازت بجائزة حاجة كدا ما متذكراها حاجة كدا غايتو تبع الأمم المتحدة المهم انها جائزة محترمة في مجال العلوم وغيييييييرهم ...

_________________________

وشباب زي شباب تعليم بلا حدود ( حركة - تغير - اجتماعي ) / مشروع النهضة وغير كتير في أفكار الناس / اليوم السوداني للكتاب / TEDxKhartoum افكار تستحق الانتشار , حسي شغالين في انهم عايزين يثرو المحتوي السوداني علي الانترنت " حاجة راقية جددن " / IEEE ناس مجموعة مهندسي الكهرباء والالكترونيات ويتطورا التكنولوجيا المتعلقة بالمعلومات / في مشروع حسي برضو محتاج الناس تصوت ليهو مشروع ممكن يودي السودان لقدام وينهي معاناة الناس في دارفور " مدينة الأمل " فهمو انو عايزين يعمل تنمية للمتضررين في دارفور ............................................ ألخ , يلا أمثال الشباب العثل الفوق ديل هُم الحيدو الوطن دا معني / طعم / نكهة وهم البيهم السودان حيمشي لقدااام / قداااااااااااااام ...

_________________________

يلا أنا مبسوووطة شديييد / شدييييد ,, مبسوطة منك انتا / ي وبيكم , ومبسوطة من الشباب السوداني الأكثر من رائع , ومن الحياة برضو مبسووطة ,, وأنا بحبكم كلكم وبحب الحياة ...

♥ :) القلب دا طالع من جووووا / جوووووا من الأعماق والابتسامة نفس الشئ ...

التوقيع : مكتووب بحب .

الاثنين، 29 أبريل 2013

قصتي مع الوجود !


أنا من هُنا , من بلاد الطيبة والطيبن
بعضهم يسمونها بلاد " الكيزان " يكرهونا حد الموت !
ليتهم يفرقوا بين التاريخ وبين الجغرافيا !!
التاريخ مُذنب ,, الجغرافيا بريئة
حِبُ الجغرافيا , وأكرهو أفعال التاريخ ! ..

                  *
ولدت كما تُولد الناس لي أب ولي والدة
ولي أخوة لُطفاء , ولي أصدقاء كُثر أوفياء
ولي بيت كثير النوافذ ,, وحلم بنافذة ..

                   *
قالو أني ولدت في ليلة حالكة ظلماء , واني أنرتها بقدومي
هكذا هم يقولون , ولا أدري أحقيقة ما يقولون أم مُجاملة ؟!
لأنني أعيش بين شعب لطيف يحب اللطافة والمُجاملة ..
                 
                    *

قالو أنهم فرحوا وزغردو وزبحو الكبش
وعزمو الأهل والأصحاب والجيران يباركو المولود
أنا لأ أدري أهم حقاً كانو فرحين ,, أم فقط يقلدوا ما وجدوا عليه ابائهم !؟

                     *

أنا لم أكن وقتها أدري :
من أنا ؟! ومن هُم ؟!
ولماذا أنا , أنا ؟! ولماذا أنا هُنا؟!
ما الوجود ؟! وما العدم؟!
ما الزمان ؟! وما المكان؟!

ما الماضي ؟! ما الحاضر؟! وما المستقبل؟!
وماذا بعد كُل هذا ؟!
ولماذا هذا السيناريو العجيب / الغريب / المُثير للدهشة , ولماذا كُل هذا ؟!
نحنُ لغز , والعالم لغز أكبر ,
والذي أوجدني وأوجدكم لغز أعظم ! ..

              *

أنا لا أستطيع أن أتذكر :
شهقة أمي حينما وضعتني
لهفة أبي في انتظار قدوم المولودة الجديدة .
وفرحة أخوتي وأهلي حينها ! ..

              *

قالو لي أنني أنثي وأن إسمي إسلام
قلت : صفية أم شرين أم إسلام أم عصماء
اتفه ما نحمله الأسماء ,ً أبداً لا تهمني الأسماء , فقط هي الأفعال ..

              *
قالو لي أن الدُنيا أمن وأمان وحب وسلام
لكني لم أري الا قليل من الفرح وكثير من الحزن والموت والالام
الجنوب / دارفور / كردفان /
لكننا مستقيبلاً سنصنع السلام , نعم مستقبلاً سنصنع السلام ..

                *

أدخلوني المدرسة وقالو لي بها , وبها فقط ستصبحي انسان
عجباً ! وكيف أصبح انسان وقد حُرمت من السؤال .
حُرمنا من التأمل خارج صفحات الكتاب
جعلونا نؤمن بالاجابات المُعلبة , ونكفر بالسؤال .
ليتهم يعلمون أن الوجود الخالي من التساؤل , وجود ميت
وأن الانسان بلا سؤال : ماهو الا بقايا انسان ..

                 *
فهموني أن يجب علي أن أدرس اما الطب أو الهندسة
تعجبت ! لماذا لم يقولو لي مثلا أدرسي الفلسفة أو الادارة أو الفن أو التربية
فقلت لهم أكره الابر , وأخاف من الدماء قالو لي اذا ستدرسي الهندسة !
ففكرت برهة عن أي هندسة يتحدثون ! وحينها أدركت
انهم يتحدثون عن " المَّسطرة " , وعن الشهادة التي يتحدثون بها في كُل مكان
 ان ابنتنا درست الهندسة وينادونها في المجامع (الباشمهندسة) !
( عن العقل الجمعي في وطني أتحدث ) ..

               *

أتسأل دائماً : هل كان يمكن ألا أكون ؟!
هل كان يمكن ألا يكون أبي قد تزوج أمي ؟!
أو أكون مثل تلك الفتاة التي صرخت ثم ماتت
ولم تتعرف حتي علي الوالدة ؟!

               *

أنا لم أختر الوجود
لكنني أخترت أن أُمارس " الحضور "
وشتان ما بين الوجود والحضور

               *

لم يسألوني أن كنت أريد ان أكون , أو لأ !
وحدهم أمي وأبي أختارو لي أن " أكون "
وأنا أخترت " كيف سأكون "
أن أمارس انسانيتي بتفاعلي الايجابي مع الوجود
حلماً حاضراً , عظيماً , جريئاً يُرشدني ومن حولي
حياة خالدة يسطرها , التاريخ
أزرع الأحلام في البستان
أنثر الأفراح دُرر في كُل الأماكن
وأن أبتسم دائماً ..

             *

قالو لي أنتي أنثي :
وأن الكلام حق الرجال فلا تنطقي !!
وأن الفلسفة اختصاص الرجال , فلا تتفلسفي !!
وأن الأحلام حق الرجال فلا تحلمي !!
أضحك عجباً ممن يرود في عصر صراع الكواكب وأد النساء
وأسأل نفسي :
لماذا يقيمون هذا الجدار الخرافي
بين الأنثي , وبين الذكر ..
ومن قال :
للنطق جنس!!
وللفكر جنس!!
وللحلم جنس !!

              *

يقولن لي :
أن الأنوثة ضعف
وخير النساء هي المرأة الراضية !
وأن التحرر أصل الخطايا
وأحلي النساء هي المرأة الجارية

فأضحك من كل هذا الهراء
وأرفض أفكار عصر الظلام
وأعلم  أني وهُم زائلون
وأن أفكار عصر النور هي الباقية ..